黃美棋及麥子樂今日喺灣仔，為電影《錯過》接受DBC數碼電台訪問，美棋BB話嚟11月28日係慈善首映，近日忙於宣傳工作。

講到噚日港視開台撞正大台台慶，而9點半播開台劇集《選戰》時，王祖藍喺台慶向女友李亞男求婚，被指出招搶收視。

麥子樂就話：「其實單嘢幾開心，（出招撼你哋？）我冇諗呢樣嘢，佢哋長跑咗咁多年，我覺得呢個女仔又欣賞佢，佢又欣賞呢個女仔，係好sweet嘅事。」

美棋BB則話：「睇到呢單新聞，我都諗一諗，其實作為女仔，都幾warm，因為係一個好特別求婚，大家都戥佢開心，冇諗過係咪專登做呢樣嘢。」麥子樂亦話：「諗呢樣嘢冇意思囉，我哋開心，佢哋更加開心。」

此外，黃日華同囡囡黃芷晴出席港視開台午宴，華哥叫女兒唔好搞是非，同埋唔好畀人恰。

與芷晴近日傳不和嘅美棋BB表示：「我諗做父母一定咁樣，佢（黃日華）講呢句我都袋咗落袋，藝人唔可以畀人蝦，我真係要強返啲，唔好畀人蝦，因為我一路抱住嘅心態，係有啲嘢自己知就算，時間可以證明，但有時好無奈，如果唔出聲人哋會當係真。」

麥子樂就話：「呢行係是非地，可能講句嘢冇心，但會被人放大咗。」

美棋BB再話：「我諗華哥嗰句說話冇乜特別意思，只不過所有人都啱，就算平時做人都唔可以畀人蝦，我自己袋咗落袋。」

咁噚日係咪冇同芷晴合照？美棋BB表示：「又真係冇單獨表演，綵排時佢又掛住個劇，我又掛住自己啲嘢，所以冇單獨合照。」