琦琦、鍾舒漫（Sherman）、黎燕珊、李蕙敏及江華等今日去到港台出席《耆力量—我們好聲音》活動。

琦琦擔係評判之一，佢自言係《中國好聲音》嘅粉絲：「唱歌係全世界最好嘅工作，又可以養家又開心，不過我唱歌好難聽，有時睇電視跟住哼兩句，阿女會用手遮住我個嘴，話nonono。」

同場嘅Sherman近日同妹妹鍾舒祺自製新歌《SS14》MV，佢話：「呢次係冇成本製作，淨係得我、妹妹同助手，用相機同手機App打燈。」問係咪因為唔續約TVB而增加宣傳？Sherman話：「冇諗呢啲，純粹想同妹妹玩吓，但係唔想做組合，以project形式合作仲有新意。」