【獨家】沿途同遊客Selfie MC Jin整蠱男Fans扮拍真人騷
真人騷整蠱狗仔出更MC Jin歐陽靖
歐陽靖(MC Jin)早排上大陸節目《中國有嘻哈》,雖然最終輸咗,不過就贏咗人氣。(新聞連結: http://bit.ly/2yJZb5d )今晚《蘋果》喺銅鑼灣希慎廣場見到佢同一男一女友人一齊,除咗本地人、大陸遊客認得佢,就連黑人遊客都同佢打招呼傾幾句。
之後,MC Jin就同友人搭港鐵出旺角,沿途都有唔少後生仔認得,到入車廂嗰陣,雖然人迫迫,不過MC Jin都主動同個男fans傾偈。記者聽到男fans問MC Jin近排搞緊乜,點知MC Jin就鬼鬼馬馬咁話:「吓,我哋o依家做緊真人騷喎,你唔知咩,你睇吓左右兩邊鏡頭?見唔見到呀?」然後就指指身邊嘅朋友話:「呢幾個都係演員嚟o架!」嚇到個男fans左右兩邊擰,後尾先知自己中伏。
之後MC Jin就同朋友去咗旺角朗豪坊搵嘢食,隔咗個海,MC Jin依然人氣爆燈,去到邊都有人同佢打招呼,而佢亦照單全收,雖然暫時未到發哥嘅級數,但同樣係極之親民。
搭港鐵過旺角,沿途好多人要求影相,連黑人都認得佢。