醫學會會長蔡堅老馬有火，噚日向政府發炮，指高官質疑醫生利用長者醫療券掠水係欲加之罪，思疑政府立心不良，根本唔想加碼醫療券，卻搵私家醫生過橋，蔡堅話唔想俾政府屈，揚言退出醫療券制度，至於會否號召同業響應，遲啲先討論。

唔再收醫療券

長者醫療券兩年幾前推出，70歲或以上長者每年獲5張每張50元醫療券去睇醫生，不過病人權益團體同政府發現，有醫生喺醫療券制度推出後，乘機加價或減少畀長者優惠，變相掠水將公帑中飽，因此考慮改變醫療券模式。
蔡堅噚日話配合醫療券制度，部份醫生要買新電腦，護士工作量亦有增加，酌量加價無可厚非，又指如果有證據醫生掠水，政府大可拉人或者向醫委會舉報，家陣有人暗中搞小動作，擺醫生上枱令佢火滾，佢話既然官員對醫生咁有意見，佢亦無意合作，揚言診所唔再收醫療券，至於醫學會會唔會號召醫生罷收醫療券，蔡堅話遲啲討論後才決定。