喺公共交通設立關愛座，原意係畀有需要嘅人，優先有位坐，但原來坐關愛座，未必真係會被「關愛」。前日（1日）就有一架九巴，車上嘅關愛座突然飛脫，連帶隔籬碌柱都甩埋，搞到一名乘客受傷，要送院治理呀。有網民話「連個天都認為要拆關愛座」，笑關愛座唔單止唔「關愛」，仲搞到人受傷送院，都咪話唔驚。

「搭車要扣好安全帶」都唔係第一日聽，但呢單飛甩關愛座嘅意外，就衍生咗一個「世紀難題」：究竟扣唔扣安全帶好？有網民就話，「有事發生扣咗安全帶，想走都遲人一步」，變相令安全帶都唔安全，再加上關愛座又唔關愛，以後搭車點揀好？又因為關愛座被不少網民戲稱為「廢老座」，有網民話咁先係「畀兩蚊坐車嘅質素」。

出事嘅巴士係由長沙灣開出的214線九巴，據知架巴士駛到龍翔道近豐力樓嗰陣，下層左方近尾閘嘅關愛座，突然向右傾側，車長報警，一名乘客受傷送院。九巴話關注事件，已經慰問咗嗰名傷者，而架巴士已經送咗去驗車中心，調查事故原因。

講到巴士奇聞，當然就唔止咁少啦；近日就有網民喺facebook專頁「巴打絲打 Facebook Club」貼圖，話有人發現有兩粒震蛋（情趣用品），懷疑被遺棄喺一架九巴嘅尾座，粒震蛋仲插住旁邊由九巴提供嘅USB插頭叉緊電。

學子華神話齋，香港人真係好鍾意返工，但返工壓力咁大，點都要鬆一鬆、減下壓嘅。照咁睇，唔知係咪有打工仔，諗住拎隻震蛋出嚟，喺巴士叉定電先，再拎返屋企慢慢嘆，點知落車就唔記得拎返，還是真係等唔切，索性喺架巴士度，邊叉電、邊按摩呢？就真係不得而知嘞。

有網民講笑話，呢粒其實係「共享震蛋」，係九巴嘅VIP貼身服務，秉承沿途為你「舒適」服務嘅精神咁話，亦有人話，粒震蛋其實係用家特登留畀下一位有需要嘅人，夠哂關愛呀！個post都冇提過呢兩粒震蛋嘅主人係邊個，我哋就問過九巴有冇站長執到類似圖中嘅物體，佢哋話因為唔知張相喺邊到影，所以冇回應。