日本樂壇天后安室奈美惠今日喺官網宣佈明年9月16日退出樂壇，消息震驚亞洲。

香港嘅天后容祖兒原來02年，曾跟安室前夫阿Sam學跳舞，對於安室宣告引退，祖兒喺電話表示：「安室奈美惠退休，其實佢係好經典、好有代表性嘅日本歌手，係我哋嗰一代年青人嚟講，知道佢退休，當然覺得有少少可惜，但其實諗真啲都會替佢高興嘅，代表佢完成咗呢個階段嘅歌手任務，可以進入人生另一個階段，希望佢更加豐盛，有一個美滿家庭，得閒掛住佢就睇吓佢嘅演唱會，其實我都未算最鍾意佢，我細佬好鍾意佢，乜嘢歌都識唱，所以呢件事，我諗我細佬會傷心啲。」