保險風險大 - 左丁山

蘋果日報 2002/03/26 00:00


馬會主席李福深名下嘅愛駒「師父」,報名跑星期日嘅千八泥地賽事後,竟然晨操跛腳,以致人道毀滅,真係意料所不及,養馬風險之大,係好難估計嘅。李主席呢兩年嘅馬運平平,佢有份嘅「穩操勝券」只贏過兩場,「師父」本來今季當起,點知飛來橫禍㗎。
馬匹死亡,應有保險賠償,金錢損失唔大。做馬匹保險嘅公司,如果唔係做幾百隻馬嘅投保,分散風險嘅話,賠錢機會好大,正因係咁,馬主協會每年都搵保險公司傾條件,向會員推薦,大家都可以得益。有啲馬主鍾意自己向相熟保險公司投保,唔跟大隊,冇事當然好,有起事嚟唔好彩嘅話,呢啲公司可能保一隻賠一隻,賠到肉痛,惱羞成怒,逼馬主控告馬會,煩親一村人。
保險業除咗壽險之外,其他生意都幾難做,睇吓「保險業監理專員」嘅網頁,就知道「一般保險」,特別係汽車以及勞工險,蝕到啲保險公司嗌救命,做壽險就有啖飯食。馬主N一位老友保險A係資深壽險經紀,但唔算係最巴閉嗰位,據馬主N轉述保險A嘅資料,去年佢哋收嘅「新」(注意:新生意)壽險保費,超過十億元,公司內最大嘅「馬房」嘅阿頭,分佣分到笑,收入千幾萬,真唔講得笑,人哋捱咗幾十年,現在進入收成期,冇人眼紅,包唔會炒魷,今時今日,好過做神仙。