樓市瘋狂，九龍站豪宅呎價動輒4萬元以上，名鑄呎價仍徘徊2萬多至3萬元，近日獲買家追落後，本月已錄得最少4宗成交，名人趁機沽貨。地產代理就報料，名鑄高層L室，實用面積1,133呎，啱啱以2,800萬元成交，呎價只係24,713元，平過將軍澳部份新盤。土地註冊處資料就顯示，單位原由周錫明（Simon）持有，中英文名均與曾參選2006年亞姐、攞埋最上鏡小姐嘅曾敏丈夫同名，相信為同一人。據聞周做建築材料生意起家，身家逾10億。
該名鑄豪宅單位係2009年金融海嘯後，喺樓市低位向新世界以2,516.6萬元買入，持貨9年賣樓，賬面賺約283萬元，但樓價升幅只係11%，遠較同期整體樓價升幅逾1.7倍為低。如果這9年將物業收租又是另一回事，估計收租袋走逾300萬元。