反送中一年，警暴從未遏止，執法者恃公權力凌虐人民，「犯法就係犯法」不適用於警察。今年5月，無調查能力的監警會發表被謔稱「撐警報告」，特首林鄭繼續拒絕設獨立調查委員會。子彈射眼、酷刑虐打、新屋嶺性侵、室內放催淚彈、言語侮辱，種種濫暴行為在「新真相」之下都不存在。受警暴的市民只能眾籌，寄望循民事索償討回公道。

反送中運動還會有「七警案」嗎？6.12基金臨時信託人吳靄儀認為不樂觀：「點解當年律政司會起訴七警？因為始終個法律公正，法律支持人人平等，所以你（律政司）就要伸張正義。現時普通市民對於律政司可以公平公正咁檢控，信心係零。民事索償同私人檢控，由市民主動提控，係唯一可行追究方法。」

記者 程詩敏、潘柏林

紀錄片：6.12一年 香港，去定留？

《蘋果》果燃台
《蘋果》facebook
《蘋果》YouTube頻道

西灣河中槍周同學：健健康康與手足見證光復

香港人忘不了，這一年暴政對平民所作的傷害。11月11日，西灣河，手無寸鐵的少年受槍傷，21歲的周柏均，網民稱他為「熊仔餅」，現面對企圖搶劫、阻差辦公及企圖從合法羈押下逃脫共3罪。事隔逾半年，他看到那一幕，或是新聞標題，還是會不安，「夜晚喺張床度諗諗吓，點解會有啲咁嘅事發生，點解佢哋要咁做，好困擾……」周現時不敢到西灣河站，更不用提那個馬路口。周胸膛留下1條10吋長的手術傷口，右邊肋骨底的是槍傷疤痕。

「我喊咗兩日，喺醫院睇番好多次條片，想知究竟發生咩事。」周柏均坦言，最擔心的是控罪和前途，但參與抗暴運動賠上了健康，「我都想健健康康，齊齊整整，同咁多位香港人見證（光復）呢個時候，雖然有啲手足已經離我哋而去。」父母也叮囑他要「聽醫生話」才能看到光復的一天。

周自小會跟父親去7.1遊行，傘後開始少參與政治運動，「梁游被DQ，我覺得好灰心冇嘢可以做到，直至反送中，覺得唔可以再用一個幼稚心態去面對香港發生緊嘅事。」

周受傷後最想做的是駕着電單車兜風，可惜車牌試因為受傷和疫情一再延期。談到理想，他說最想做新娘化妝或特技化妝，「但做化妝企嘅時間長，驚身體頂唔到。」他說：「經過咗呢件事，覺得好多嘢都唔係你可以控制。」

因反送中運動求醫者達2萬人

醫管局指，截至今年6月8日，急症室紀錄因參與公眾活動受傷求診人數為2,894人。而去年9月成立的義診中醫團隊「忠醫Channel」則指求診人數約20,000，最常見是催淚彈後遺症（咳、腹瀉、月經變黑等），之後是瘀傷、骨折。雖然沒有數字顯示當中多少求診者是直接因為警暴所致，但民權觀察早前指，近30%人稱被警察正式拘捕後遭受嚴重襲擊或傷害。

大律師吳靄儀指在2014年「七警案」，受害人曾健超原打算以私人檢控方式追究，「佢唔需要咁樣做就係因為律政司起訴七警，但現時普通市民對於律政司可以公平公正咁檢控，信心係達到零。」民事索償司法費用可達上百萬，吳：「但錢唔係最重要嘅問題，最重要係受害人係咪安心去告，佢咁樣做係咪受到法律保護？好多人會覺得自己唔出聲，警方唔會搞佢哋，佢哋出聲就會受到騷擾。」

吳指，警暴受害人告警察使用非法暴力時，一般要證明自己當時在該地點，結果或反被警方起訴暴動，「甚至有人提出訴訟後都放棄，呢個制度對佢哋好唔公平。」截至4月30日，6.12基金為7宗民事索償，預留1,069萬訟費。

楊子俊老師：爆眼少女令我驚覺自己太自私

6.12，下午4時，金鐘紅棉路及夏慤道交界，楊子俊指着影片中戴着安全帽的自己：「我冇任何動作，嗰時我護目鏡都冇戴。」楊被控暴動，去年10月已「踢保」，他年頭正式入稟兩案，包括對「速龍小隊無展示警員編號」司法覆核及向警方索償人身傷害，本月30日開庭。1年前低調的女拔通識老師，本沒打算索償，「嗰時律師睇法係唔抵，如果因為控訴警方而令我被加控暴動罪」。

去年自由之夏，楊Sir剛完成眼部手術，24小時要維持俯卧姿勢，保持眼壓助傷口復元。「爆眼少女嗰晚，我瞓喺度睇直播，我真係瞓唔着，（看到）又有市民因為警方使用暴力受傷。嗰下我非常之內疚。」「運動初期受害者受到嘅關注最多，律師係最好嘅，財政資源都較多，如果我都唔去挺身而出，話畀警方知使用暴力係有後果，只會有更多市民受害。」8.11改變了他人生軌迹，之前積下的憤怒一下子爆發，「原來自己同香港人一樣，已沒有退路。」他立即聯絡負責自己個案的醫生和律師，冀助爆眼少女，亦立下決心向警索償。

提起受傷的眼睛僅剩下2.5%視力，右眼近乎全盲，楊Sir出奇冷靜，他指專心工作時會戴眼罩，但日常雙眼並用，影像會模糊和有幻光，「保持住訓練對眼，令受傷嘅右眼唔會退化或者失焦。距離感差咗，最大分別係以前可以通宵改卷第2日返工，但而家改一陣要唞唞，（感到）眼乾。」

楊Sir因為以公開身份追究警暴而被惡意攻擊、起底，他反而想用這些「名氣」，鼓勵同路人不要放棄，「我覺得法律程序都係一種抗爭，呢個運動冇一本教科書，冇人話畀你知點做先有用。」他認為運動1年，自己對「香港人」感覺昇華，「大家目標一致，有共同訴求，有共同回憶，係手足，同路人，呢啲就係好多民族或者地區對自己身份建立嘅開始。呢種內化咗（嘅）感覺，我相信短時間內唔會消失。」被運動影響前途，但他更擔心敢言的同工飯碗不保，未來「唔會局限喺教學生涯上，希望教育界代表會將抗爭帶入議會，同意35+贏多啲議席。」

7.21遇襲廚師：抗爭建立港人身份認同 比血緣更大連繫

遇襲廚師當日辛勞工作1日終於下班，突然被20名白衣人在元朗街頭圍毆，1個月後警察才錄了1次口供，近1年調查音訊全無，這就是7.21遇襲廚師蘇先生的經歷。每月21日他克服恐懼，如常在元朗上班，或是參加紀念集會。今年5月記者約遇襲廚師蘇先生做訪問，他爽快答應。問起警方後續調查，他吸了一大口氣，「（去年）8月中錄1次口供，直至而家。咁多個月冇再有任何跟進，冇認人、乜都冇，亦都冇講同我講調查結束，畀我感覺完全好似係當冇回事。」

蘇先生說，過去1年香港有很多小型7.21事件，例如5月初樂富有人清理連儂牆時，持械襲擊附近街坊，影片顯示警方涉嫌放生疑兇，「同樣事件以差唔多形式發生1次，咁都得嘅？」他對警方調查不抱期望，亦對香港司法制度感失望，「支持政府（的人）做乜都輕判，你攞把刀捅人，（法官）仲可以話高尚情操嘅。」

這1年間蘇先生接受各地傳媒訪問，一次又一次翻起被圍毆經歷。他說，有年長受害者說起7.21經歷會忍不住哭起來，自己既然克服到恐懼，更覺得有責任受訪，趁傳媒仍然關心事件，受害人仍有「新聞價值」時，希望提醒大家不要忘記，「而家仲有影響力唔做，30年、40年後連講（嘅）權利都無。」

他說，以前中學年代讀通識科，要比較不同身份認同，會認為自己先是香港人，亦是中國人。今日他身份認同只有香港人，理大圍城對他觸動最深，很多港人趕赴理大外圍，甘願為陌生人冒險，「唔理幫唔幫到，真係盡佢哋能力去做。有車出車，冇車我就出人，我做到乜都好，我出嚟齋企、齋行、齋講口號都好，真係感受到佢哋有共同目標……唔係血緣連繫，比血緣更大連繫。」

吳靄儀：挺身而出的受害人未得到足夠精神支持

前教大學生會會長梁耀霆，8.31以涉嫌非法集結被捕，之後被無條件釋放。他入稟要求港鐵交出當晚閉路電視片段，3月勝訴，但得到影片只是索償的第一步。「單計8.31事件，好多手足有見律師去尋求法律行動可行性，但大家都只係普通市民同學生，係咪個個都承受到呢個壓力企出嚟？」他希望自己個案成功會幫到其他8.31受害人。吳靄儀認為社會未能給予警暴受害人足夠精神支持，法律又不能保障他們，「我希望大家畀呢啲受害人更多精神上支持，如果佢哋係因為去告警察而令自己被人告，我哋應該揭露出來。」

-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多