曾拍攝《繼承者們》、《Doctors》等人氣韓劇嘅女星朴信惠，噚日襲港今晚喺九展舉行「2017 Flower of Angel 亞洲巡迴粉絲見面會」嘅香港站，今次係朴信惠事隔兩年再訪港見粉絲。

朴信惠嘅粉絲見面會原定晚上8時開始，不過就遲咗10分鐘先開場，播完短片後，身穿黑色連身裙嘅朴信惠現身唱歌出場，粉絲立即尖叫歡迎，並高舉粉紅色螢光棒為偶像應援。

隨後朴信惠以廣東話「大家好，我係朴信惠」、「有冇掛住我啊？」同粉絲打招呼，及後表示：「好耐冇見，大家過得好唔好？我都好掛住大家，隔咗咁耐再舉行粉絲見面會，我都好緊張，而且今次『Flower of Angel』見面會香港係首站，所以更加緊張。上次來港時答應過大家會再見面，所以就揀香港係其中一站。」

之後朴信惠再獻唱兩首歌曲，包括《繼承者們》嘅OST《Story》，當大銀幕播出佢同李敏鎬劇中片段時，粉絲立即興奮大叫，而朴信惠唱完歌後台下粉絲用韓文大叫「好靚」、「我愛你」，朴信惠聽到後怕醜甜笑。