連詩雅(Shiga)早年喜愛夜蒲，同曲赤舌戰，又指佢連𠝹23仔，連關楚耀、王浩信、黃家諾、周柏豪等均被傳過係Shiga嘅裙下之臣，直至前年《蘋果》影到佢同「麻雀館大王」石鑑輝家族成員石恆聰(Anthony)一齊去中環蘭桂坊夜蒲後，雙雙返男友家度春宵，Shiga其後大方認戀情，成功冧掂「鑽石王老五」。

Shiga自父親生意失敗拋妻棄女後，一直同媽咪租住劏房，據知Shiga成功媾掂有米Anthony後，即時脫貧由灣仔劏房舊樓，「升呢」搬去九龍塘畢架山龍景樓近900呎單位，月租5萬元，Anthony亦好識花心思，送過一個逾兩萬元嘅巴黎世家手袋冧女友，出手都算豪爽。

有傳Shiga為咗箍實有米男友，曾向公司表明要轉型拒行性感，Shiga出活動亦講過同Anthony識咗七、八年，大家識嗰陣，Shiga都未入行，點知幾個月前，Shiga就同有米男友分咗手，唔知生活會唔會打回原形呢!?