國家總理溫家寶，日理萬機，周身唔得閒，又要管東北啲國企改革，又要管農民收入，又要處理冤民上訪，又要打貪掃黃，去到印尼峇里島開會，諗住乘機鬆吓，食番半打沙嗲，飲杯珍多冰relax吓，點知因為阿董唔生性，搞到啲港記一見到溫總，就纏住佢講特區問題。
溫總講嘢，一向溫文爾雅，又引用詩詞典故，出口成文，風格鬼死咁董橋，特區問題嘅罪魁禍首係邊個？溫總梗係清楚，不過佢一向都「話到口邊留幾句」咁解啫。
今次寶哥哥峇里講話，照例又冇提個董字，不過就好坦率咁承認，英國佬領導咗香港一百五十幾年，而特區政府嘅統治，只係得好短嘅六年，係缺乏經驗嘅咁話。
呢番說話，無疑相當感人肺腑，可惜，若然係六年前嘅七一主權移交嗰一晚，喺會展中心由江總把口講出嚟，警告港人治港全無經驗，好可能唔夠英國佬咁出色，咁香港好多人想買樓，都會諗一諗先，今時今日，香港就少咗好多負資產。
可能怕坦率得滯，返北京會有人詐型，溫總跟住補飛話，相信港人能治理好香港，又話希望特區政府要繼續發展經濟、改善人民生活。