King sir鍾景輝 今日80歲大壽，喺將軍澳筵開60席，好多朋友弟子出席。

杜琪峯啱啱喺台上分享時表示，17歲跟King Sir學習，係King sir令佢鍾意戲劇；又話自己應該係做演員，唔係做導演。為咗報答King Sir，有生之年一定要做一次男主角，杜琪峯仲話一生都會記住King Sir當年嘅教導：「做多啲、睇多啲，畢生受用。」

黃秋生接住上台致辭，佢話原本準備咗3頁講辭，但上到台都好驚會發台瘟。秋生又引用King Sir之前執導《西哈諾》呢套劇嘅對白，以單人相聲方式送上各種讚美，包括形容King Sir係戲劇巨人、泰山星斗、甚至係成個宇宙。

讚完一輪，秋生突然King Sir上身，用佢獨特嘅聲線講咗句：「唏，冇你哋咁好氣呀，你哋鍾意講乜就講乜啦。」之後仲邀請咗大師兄毛俊輝上台，毛俊輝話今日自動請纓：「17歲就認識King Sir，當年入咗浸會，發現有位老師係讀戲劇，自己執到寶，俾King Sir影響，每個禮拜都好期待演藝課堂。」

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。