法籍騎師巴度今季崔護重來客串，至今上陣94次，獲得五冠七亞四季，頭馬數目與摩廐主帥貝湯美看齊，而多杜利萊一Win。

今期（23日）日賽巴度騎七駒，其中第一場沈廐「港林福星」，四歲馬質新當起，加強配搭可再贏一場。

第一場四班田草2000米：「港林福星」跑姿論盡，兼且翻步慢，腳法合跑中長途，如廐侶「小米周」。

前仗跑谷草2200米，前中段留居尾叠，直路以勁勢衝贏所有對手，贏馬姿態有餘未盡，跑長途表現開竅，好似上季的「特獎」及今季的「智有心得」，跑四班賽亦夠贏。

上場潘明輝走位車前倒後，末段取位亦不順暢，敗績未能作準。今場強配巴度，末段鬥後勁更加硬淨，只負114磅，穩位望贏。

「其樂無窮」近五仗都跑入前五名，近期狀態在勇點，上季跑三班同程只輸半馬位得第三，縱使今季實力略有退化，目前評53分亦力足爭入Q。

「好腳頭」在港累積五場頭馬，上場贏泥地1800米，證明本身七歲仍當打，過往亦贏過同程，跑草地亦不能輕視。

另外，今場放頭馬不多，「皇帝誥令」跑法可以主動，有力爭入三甲。