翁靜晶大女劉萬儀，前排簽約咗模特兒公司進軍娛樂圈，當時佢行咗一個手錶騷，以新人嚟講表現都算唔錯，但一直未聽到佢嘅新動向，直到噚日媽咪翁靜晶喺fb上載咗萬儀嘅近況，留言話：「劉萬儀憑個人努力，終於躋身荷李活，但並不是做明星，而是做記者訪問員。」
原來萬儀以記者身份去咗紐約採訪Tribeca Film Festival電影節，喺紅地毯採訪David Darg和Olivia Wilde，翁靜晶跟住仲話：「流利的英語，應該就是贏得這份差事的先決吧？讀好書，始終是對的，她接下來便會考紐約律師牌了。」
馮仁昭打電話畀翁靜晶，諗住問吓阿女點解無端端走去做記者，點知佢話：「我都唔知呀，佢一個月前同我講，話去考紐約個律師牌，之後再WhatsApp話我知呢件事，聽佢講呢個job係幾幸運，本身個女主持突然好似病咗定有事去唔到，所以俾佢頂替。」佢仲話：「我諗佢今次有少少破釜沉舟嘅心態，唔想靠我，想做啲嘢出嚟。」

律師娛圈雙管齊下

話晒呢份工認真唔易做，唔知媽咪又會唔會為萬儀驕傲？翁靜晶坦白話：「講真係好擔心，但係佢叫我唔好用香港電影界角度去睇，其他地方可能啲制度比較完善，我最驚唔好嘅嘢未必會發生，之不過佢真係幾掂，做到咁冇嘢好講，俾我自己都做唔到呢份工，做娛樂記者都好，訪問吓啲明星，點都好過佢做明星。可能佢都有少少想雙管齊下，又做律師，又做明星，但係𠵱家佢都證明到自己係做到，我又唔想話佢一定做唔到，或者俾佢成為第一個。」
撰文：馮仁昭