龍年多人生龍B,亦有人趕做龍新郎。食物及衞生局局長周一嶽的政治助理陳智遠(Paul)鐵定今年6月,同拍拖幾年嘅女友拉埋天窗。八方聽聞未來陳太係佢大學同學,一直非常「十卜」另一半;嗰時阿Paul考慮入由大學跳入政府,女友都相當支持。
阿Paul今年30有2,係時候成家立室。但點解要揀今年6月?原來同佢嘅政治委任合約6月30日到期有關,佢話因為就嚟卸任,心情輕鬆啲、時間又鬆動啲,相信搞婚禮都開心啲,仲覺得咁樣可以為自己嘅政府生涯,劃上一個完美句號。至於有冇造「龍」大計?答案係一切順其自然。趕唔切造龍B,咪造蛇仔囉;年輕人,有心有力呀。