【新增短片】
香港大學今日頒授名譽社會科學博士畀國際知名鋼琴家郎朗，亦都係港大校長馬斐森任內最後一次頒授名譽博士。郎朗喺致辭時話做藝術家從來唔易，慶幸自己可以將最喜歡嘅事化為職業，又話好想證明畀人睇，古典音樂都可以又型又正，所以可以一直堅持至今。郎朗寄語應屆畢業生唔好太擔心未來，應該努力搵自己真正熱衷嘅事，繼續一路堅持，仲話要「Let yourself be the instrument of your life」。

現年35歲嘅郎朗年紀輕輕成名，6年前仲喺奧巴馬同胡錦濤會面嘅國宴上面表演，近年佢就致力搞音樂普及教育，包括扶助年輕音樂家，籌辦表演。

郎朗形容香港好似自己屋企咁，每年都會嚟香港表演，但慨嘆唔少亞洲父母諗法比較現實，未必支持子女做音樂家，但佢覺得音樂嘅價值唔可以用錢嚟衡量，「尤其是已經唸到大學，你肯定知道自己喜歡什麼，不可能因為父母喜歡甚麽（就做甚麼），不能因為這個職業掙錢快就做，那個掙錢慢就不做。」