【新增內容及圖片】
韓國女團KARA嘅27歲前成員具荷拉，上周因涉嫌毆打27歲髮型師男友A某而驚動到警方。具荷拉當時向警方表示A某醉酒後偷偷潛入自己屋企並率先動手踢佢，而A某前日接受韓媒《朝鮮日報》訪問時，就強調冇出手打過女方，同時公開額頭、眼下、鼻旁三道超過3厘米嘅傷痕。（相關新聞連結： https://bit.ly/2Dfcnp1）

而具荷拉就接受韓媒《Dispatch》訪問，同時公開自己受傷嘅照片。具荷拉表示，A某平時非常溫柔，不過只要有異性跟自己聯絡，A某就會變得好可怕。10日，具荷拉跟經理人以及某男性朋友一齊食午飯，但具荷拉冇通知男友。

之後男友A某跟經理人通話後，得知當日具荷拉跟男性朋友食飯，覺得被女方欺騙。

而具荷拉嘅室友就表示，13日淩晨，A某飲酒後進入具荷拉屋企，當時具荷拉於室友房間，室友表示：「A某當時去到我房間，我扮瞓，A某就用腳踢具荷拉。」

之後具荷拉跟A某起爭執及發生肢體衝突，具荷拉表示：「A某對我破口大駡，我都推佢，A某扯我頭髮，將我推向白板，仲掟空氣清新機，我都捉住佢，打得好厲害，身上都係瘀傷。」

室友聽到A某離開後，見到白板掉落、門破掉、空氣清新機破碎，而且具荷拉披頭散髮，膊頭同腿都係瘀傷。據知A某離開時表示：「我要了斷你嘅演藝生涯。」

具荷拉解釋，當時見面嘅男性朋友係演藝圈資深人士，二人見面係傾畫報拍攝事宜。具荷拉嘅室友表示：「A某成日疑心工作上嘅男性，成日要檢查對方係邊個，飲醉之後會胡言亂語，具荷拉因為厭煩所以冇跟佢講實話，造成惡性循環。」

《Dispatch》亦見到A某辱駡具荷拉嘅髒話短訊，具荷拉表示：「因為呢種事接受採訪真係好羞愧，但係要講清楚，即使唔可以再活動，都要講明是非。」具荷拉將跟警方見面，並公開醫生診斷書。具荷拉公開嘅婦產科診斷書中寫著，患者出現子宮及陰道出血的症狀，需靜養一周左右。而另一份整形外科嘅診斷書，就寫著患者頸椎、臉部、下肢等多處有扭傷及挫傷。具荷拉嘅代表律師今日向韓媒透露，具荷拉將會接受警方調查，而且唔會跟A某和解或達成協議。

今日A某接受韓媒訪問時表示，佢將於今晚韓國時間9時到江南警局接受調查。A某表示，本來至今日早上為止，佢都想通過律師及熟人跟具荷拉和解。不過因為被指「闖入住宅」及「《Dispatch》嘅不真實內容」，令A某認為和解無意義，因而決定接受警方調查。

精選韓流，喺晒《娛果》
http://fb.com/appledailyent