就咁睇張相，見到德甲法蘭克福成班球員喺完場後咁齊心答謝主場球迷，你可能以為佢哋贏咗啲乜嘢比賽。實情係法蘭克福「只係」喺聯賽主場贏慕遜加柏2:0，喺聯賽榜暫時跳升到第2位。唔係話咁嘅成績唔好，但如果球迷有跟開德甲，就會知呢場波對法蘭克福嘅球迷嚟講有幾咁重要，因為呢場係球隊超過兩個半月以嚟嘅第一場聯賽勝仗。

法蘭克福今場喺43分鐘由中場奇雲保定先開紀錄，之後要到補時兩分鐘，先至由前鋒盧卡祖域射成2:0。聽落唔算好驚險，之但係如果唔係慕遜加柏中場杜根夏薩特、即係車路士中場夏薩特嘅細佬，喺78分鐘射失12碼，法蘭克福有無得打破呢個長達83日嘅德甲主場不勝魔咒都仲係未知數。

法蘭克福對上一次喺主場贏波，已經係舊年11月4號贏雲達不來梅2:1，球隊之後四場主場聯賽輸兩場和兩場，前後足足兩個月零22日無喺主場贏波，今日破咒梗係要好好答謝球迷。或者你會諗，主場戰績咁差都可以喺德國排第2？法蘭克福主場戰績的確係降班份子嚟，喺18隊波入面排16位，但佢哋其實係作客王，今季踢十場只係輸一場，六勝三和嘅成績只係輸俾主、客場成績都係No.1嘅拜仁慕尼黑咋。