歐洲眾頂級球會喺今個夏天入貨,但阿仙奴就出貨。如無意外,阿仙奴應該留唔住法比仔、拿斯尼同基捷基治,其中基治幾可肯定以800萬鎊(約1億港元)過檔曼城,只係差少少細節;拿斯尼就可以喺曼聯同曼城之中二選一,如果去曼城,周薪就由9萬鎊跳升至18萬鎊,但佢唔認為自己係銀紙至上:「錢從來唔係我嘅考慮範圍,我只會從足球方面去諗。」法比仔就極有可能以3,500萬鎊會返母會巴塞隆拿,而且聽講今日唔會返兵工廠參加開操㖭。
球隊俾人拆骨,領隊雲格經已頭痛,不過咁都未算,事關據聞車路士加入戰團,入兵工廠搶貨。英國《星期日郵報》就話,車仔睇中阿仙奴嘅英格蘭翼鋒禾確特,聽講仲願意出2,000萬鎊買㖭。禾仔喺09年先同阿仙奴續約4年,唔好似基捷基治同拿斯尼咁喺明年夏天就約滿,其實雲格冇乜必要要賣佢,但問題係禾仔容易傷,加上個價咁靚,冇理由唔做呢單生意啫。另外,加拉塔沙雷亦打阿仙奴球員嘅主意,計劃用1,350萬鎊簽喺英超發展得麻麻嘅俄羅斯前鋒艾沙維。