大摩貝湯美會解約?
大摩解約貝湯美阿Joe
貝湯美今季出任大摩主帥,暫時替波士贏咗三場馬,或者外界對呢位摩廐主帥有太大期望,偏偏湯美仔似乎未達到預期要求,某啲馬亦跑得麻麻。馬圈最現實,交唔到貨自然一沉百踩,有馬主同馬迷已經唔多睇好湯美仔留港嘅前景,私下估佢好快會同大摩提早解約。
大摩練多兩季就退休,事隔多年再請主帥,相信都係想重溫冠軍滋味。其實好多摩廐馬主都好信任大摩,信佢揀馬眼光先會揼本買高價馬,大摩想請主帥,班馬主一定支持。大摩想搵貝湯美做主帥,都要湯美仔肯制至得,既然湯美仔肯放棄澳洲策騎事業,反映雙方對合作都有一定誠意。
有人唔睇好大摩同湯美仔組合,又唔係話冇原因,大摩過去嘅紀錄又係麻麻,除咗同白德民合作較長時間,經常都同主帥提早分手。而上次日馬同國慶日兩次本地級際賽,摩廐出動馬海戰術,結果贏嘅摩廐馬全部用本地騎師,主帥騎親都係副車,自然令人覺得湯美仔唔受重用。不過,始終大摩係湯美仔波士,湯美仔都要聽話,尊重老細嘅配搭安排。
大摩嘅部署永遠唔易畀人估得中,事後眼光睇,早前國慶盃可能本來主力係主帥隻「新力風」,點知臨場一陣雨幫咗廐侶「飛來猛」;至於啱啱沙田錦標貝湯美騎「明月千里」,話晒係前馬王,主帥騎亦合理,呢啲明星馬目的係為稍後嘅國際賽熱身,湯美仔唔放手,可能遲啲收穫更大。
大摩今季都未正式發動攻勢,馬迷都唔使咁快批死貝湯美冇運行,或者睇埋年尾國際賽再估佢去留都未遲。雖然大摩近季較少喺谷草出擊,但係今晚(25日)四隻出賽馬全配主帥,冷門又唔怕小敲。