夫妻間打情罵俏固然可以增進感情，出名係愛妻號嘅梁漢文（Edmond）自爆同太太一齊學泰拳後，經常喺屋企大打出手，今日佢同方力申、杜德智一齊出席荃灣舉行第四屆「揹水一戰」啟動儀式，活動上仲有鄧麗欣（Stephhy）、丁子高、周秀娜同楊淇一齊支持拍宣傳片，Edmond同小方喺現場同Fans一齊跟杜德智舉住4.5公升水做健身操。

Edmond同小方同樣係熱愛運動，平日都不時鍛練體能，所以今次揹水跑山絕對考驗唔到佢哋，Edmond指以往太太唔鍾意做運動，自從婦女病癒後，佢就鼓勵太太做運動強化心肺功能，先教太太游水，再跟太太一齊學泰拳，佢話:「自從老婆有事，我上網搵資料知道原來婦女病係因為女性荷爾蒙過多，所以學打泰拳有助激發男姓荷爾蒙，o依家佢成個人麻甩晒，我哋成日喺屋企隻揪。」

Edmond坦言唔敢打太太，只係太太出拳自己擋，打下打下慢慢增進感情，當Edmond問到身邊小方平日同女友Stephy做乜？小方話:「嗌交，都係溝通一種，平日又一齊開工。」Edmond即提議佢哋學跳舞，仲笑晒口話:「跳跳下就唔只喺廳度跳。」小方即指自己舞技唔掂。