因為驚爆涉虐女被捕而成為新聞人物嘅吳綺莉，今日傍晚返抵灣仔數碼電台辦公室開工，現場有大批傳媒採訪。

吳綺莉開腔：「喺度首先要同大家講對唔住，搞到大家呢排咁頻撲，其實成件事0依家交咗畀律師處理，件案件唔係太方便講，我覺得0依家對我嚟講，首先要顧返我小朋友嘅感受先，始終佢係一個小朋友，希望大家唔好去騷擾佢，因為我覺得畀佢正常生活，我自己嚟講會繼續努力工作，學習做一個更好嘅媽媽，咁係囉...係囉..唔好意思呀﹗」

問到會否戒酒？佢話：「其實我會覺得..嗯...好多方面會學，係囉﹗。（仲未見卓林？）係呀。（喺醫院？）應該係，應該係，多謝大家關心，連日來搞到大家唔好意思，我0依家希望做好啲工作，拍好啲節目。」咁有冇以其他方式溝通過？佢就話：「暫時未有﹑暫時未有，社工幫我溝通緊。」

會否繼續一齊住？吳表示：「暫時我係要聽返社工嗰邊決定，畀多啲空間小朋友，努力工作，唔該晒。」問到會否擔心失去囡囡監護權？吳再說：「呢樣唔係我去擔心嘅嘢，我覺得冇嘢畀我同個女中間嘅溝通更加緊要，其他嘢我暫時回應唔到，平時你都知我會答大家好多問題，但今次好抱歉，我真係唔可以答住。」

再問到疑似毒品係邊個？佢就話：「我真係成件事唔清楚，成件事交晒畀律師，因為我一路唔喺屋企，所以係囉...唔好意思對唔住，唔該晒﹗」

問到有冇懷疑卓林有吸毒習慣？佢以普通話回應：「我剛剛也說過，所有問題我都不會回應，全都交給律師處理，所以希望大家給一點空間孩子。」

咁係咪有經濟壓力，所以工作唔開心？佢表示：「訪問也說過，很多東西加起來，應該交給律師的就交給律師，想把工作做好，今天要錄音，明天還要外景，將工作先做好。」咁卓林爹哋有冇關心？吳再說：「我不太清楚，人家事情我一直不太管的，最重要是小孩子平安。」