譚詠麟（阿倫）父親譚江柏前日上午在養和醫院病逝，享年九十五歲，有「譚銅頭」之稱的譚江柏是球壇一代名將，曾代表中國隊出戰奧運。阿倫昨日指父親走得有福氣，離開塵世時所有子女均陪伴在側，又表示感謝老父多年教誨，自己才有今天的成就。

剛遭喪父之痛的譚詠麟，昨日在電話中談及父親譚江柏的死訊時，語氣十分平靜，他說：「老竇係噚日上晝去嘅，呢兩日要辦理後事，所以好頻撲。老竇今年九十五歲，係笑喪，佢近年身子麻麻，年幾前跌親盆骨，做咗大手術之後身體各方面嘅機能都開始差，但能夠捱到𠵱家身體都算幾硬淨。」
譚伯做完手術後，阿倫年前便安排老父入住老人院，並由專人二十四小時貼身照顧，他說：「老竇入老人院之後，器官衰退，肺部做過小手術。」阿倫又指母親雖然難過，但畢竟父親年事已高，早有心理準備。

子女伴身旁
「老竇走得有福氣」

阿倫續說：「其實老竇走得有福氣，之前情況轉壞，家姐細妹都喺外國返晒嚟，前晚成家人都喺醫院陪佢最後一晚。我同家姐細妹講，如果老竇走嘅話，唔好表現得咁難過，唔好喊，如果唔係佢會唔捨得走，噚日凌晨六點幾，見佢好辛苦，我响佢耳邊講：『放心，班仔女會記得你教誨，你安心上路，瞓醒覺之後會去到樂土㗎啦！』結果幾分鐘之後佢就走咗。」
譚伯病逝一事，阿倫未有向好友曾志偉等人透露，他表示稍後會公布後事的安排。有傳譚伯近年已不會認人，阿倫說：「係，見十次面有兩、三次唔認得，但一定認得我係阿倫，我每次喺佢身邊講嘢，佢都有反應，但我唔敢講太多，怕佢唔捨得走。」
阿倫說：「最初我入行嗰陣，老竇反對，但後來睇到我誠意，開始鼓勵我，佢八五定八六年仲上台頒獎畀我，勸我勝莫驕，應承咗嘅嘢一定要做，做嘅時候要全力以赴，唔好計較得失，凡事對得住人、對得住自己，人哋自然會睇出你嘅誠意。就因為老竇教誨，我先至做出今日成績，雖然老竇過咗身，但我應承咗人嘅嘢一定會做，月底有幾個活動，只要時間遷就到，我都會盡量到。」

此外，彭健新與鍾鎮濤（阿B）當年與阿倫組成溫拿樂隊時，常結伴到其家開會消遣，故與譚伯相當熟稔，彭健新昨在電話中透露四日前曾到養和醫院探望譚伯，他說：「嗰日我同阿倫約咗食嘢，佢話要去醫院探吓老竇先，我咪同佢去囉，去到譚伯瞓咗覺，我哋坐咗二十分鐘，之前佢喺護理院，我都周不時去探佢。」健仔謂譚伯給他的印象像老頑童，他說：「佢好好玩，好鍾意講笑。」
而昨日身在上海的阿B在電話中得知譚伯去世後，聲音顯得很失落，他說：「佢好錫我哋，當我好似仔咁，記得有段時間我唱歌失方向，佢突然同我講話我唱歌唔應該咁唱，啲氣要點運用，我一直好感激佢，好尊重同敬愛呢位老人家。」

後輩同懷念
阿叔：佢條頸好粗

效力無綫的著名足球評述員林尚義，表示對譚伯病逝深感可惜，他說：「佢係一個好嘅足球員，頂頭槌好勁，我十七歲入東方足球隊踢波嗰陣，啱啱係佢喺東方最後一年，佢都有教我哋頂頭槌，但佢條頸好粗，冇人學得到。當年佢幾牛精㗎，我哋成日俾佢鬧，聽到佢呢個消息當然覺得好可惜啦，但佢年紀都好大，生老病死係人生必經嘅階段。」
採訪：林妃、蔡如玉