當年今日
關於我們

【李八方online】攞架嚟丢2! 何君堯跌落地揦番揸沙

蘋果日報 2019/06/07 12:02

何君堯引渡惡法

日前由資深大律師陳景生領軍嘅30名法律界選委,拒絕應聲言可以「以1對30」嘅立法會議員兼執業律師何君堯邀請有下集喇。何君堯尋日回信畀陳景生,死撐自己邀請選委係因為特首林鄭月娥唔肯見選委,咁下一步就應該係選委同議員傾喎。唉,好心搵人提吓佢,衰咗就出少句聲喇,陰公。
話說係法律界選委約林鄭在先,林鄭表明唔肯見,何君堯就飛身撲出嚟。陳景生惟有好客氣咁同何君堯講,何生都唔係代表特首或者特區政府,除非何生喺政府有位置,否則選委無理由見何生嘅。為咗令何君堯好落台,陳景生仲話如果君堯想同選委傾都可以個別約嘅。
何君堯就硬係鍾意衝出嚟攞架嚟丟,尋日佢回信畀陳景生,一嚟要對選委唔應約表示失望,二嚟就話要講番清楚,佢無話過自己代表特首,只係見特首唔應選委約,咁選委嘅下一步咪應該說服議員,換言之個波喺佢度。跟住何君堯仲話自己唔會自大到唔見選委,佢度門仍然打開,若果選委會臨時縮沙就唔好嚟,否則佢留番隻糉畀選委。最後再補多句話其實自己都係選委,睇唔到選委身份佢同有咩關係,或者有咩議價能力。
八方好奇嘅係封信係咪何君堯自己寫嘅呢?相信都係,大家睇完就會明,因為成封信嘅思緒都幾紊亂吓。
民陣6.9反惡法遊行
日期:6月9日(日)
集合地點:維園草地
時間:下午2時30分集合、3時正起步
遊行路線:維園草地遊行至金鐘添美道立法會
(資料來源:民陣)
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX