雷頌德太太梁家玉（Jade）今日喺灣仔為烹飪書舉行發佈會，邀請咗方力申、梁芷珊同林文慧等到場，Jade透露打造咗一本不一樣嘅烹飪書，所以佢以靚相示人，仲搵老公阿Mark親自操刀影相，問到Mark係咪要試食？Jade話：「佢長期餵食，我負責煮，愈嚟愈瘦，佢就愈嚟愈肥。」

Jade話因為近日都好忙，所以聖誕會去新加坡旅行充電，明年嘅目標係到國外進修藍帶廚藝課程，至於會唔會考慮追個女？Jade聽到即刻話：「係咪玩嘢？唔會用追嚟形容，一個小朋友要用好多心機、時間同金錢，如果係要做多30年嘢，o依家3個仔已經好滿足，再有意外先算。」

至於小方今個聖誕係甩拖後首個Lonely Christmas，佢話：「有朋友約我24號打籃球，之後同隊友食飯，我話唔得，對住同一班人咁耐，我寧願返屋企煮公仔麵。」問到有冇約女仔同對象？小方就話冇。

講到食嘢，小方就話自己對食都有要求，不過細個時方媽媽就唔畀小方入廚房，因為覺得煮嘢食好辛苦，小方o依家就有啲後悔，佢話：「如果另一半又唔識煮，咪要捱餓。識煮嘢食嘅男士係有魅力嘅，同埋藝人識煮嘢食可以拍節目。」問佢有冇試過緋聞女友超蓮嘅手勢？小方就話：「冇呀，唔答人哋嘅嘢。」佢話如果女仔識煮嘢食嘅都會加分，仲話佢媽咪煮嘢食好叻，所以花名叫肥仔，小方話：「o依家30幾歲，距離十幾廿呎都叫我肥仔。」