新界佬同環保團體一直水火不容，鬼咩，過去幾次啲新界靚地都係因為環保團體要求保護，搞到佢哋見財化水。不過噚日11個環保團體同鄉議局齊出聲明，要求政府設立保育基金，平衡環保發展同新界鄉民權益。
呢份三頁紙嘅聲明大大話話傾咗四年，次次都係欠埋門一腳又出現變數，噚日亦差啲出唔到。事緣班鄉紳早兩日開過會，決定喺份聲明加多句保育之餘，亦要確保業權人嘅合法權益。環保人士基本上對呢句嘢冇咩大異議，不過嚟得倉卒，有啲團體簽紙一刻先發現，個別團體為咗啖氣，差啲唔肯簽。

最終份聲明搞掂咗，但班新界佬點解會突然加句「保障業權人的權益」？八方聽到一個版本係話，自從政府話開放邊境，佢哋一直昅實新界嗰80公頃土地，雖然政府規劃署仲研究緊，但佢哋好驚政府一個唔該，將成塊地劃晒嚟做保育區，所以講明環保都要講業權權益。
環保友覺得班鄉紳咁嘅考慮無可厚非，按可持續發展精神，可以既環保又保障業權人權益，問題在於政府𠵱家嘅保育政策有等於冇。政府將啲有保育價值嘅地，畫個圈列為具保育價值嘅土地就算，塊地唔畀發展，但又唔會投入資源保護，由得佢荒廢，有時仲變成四驅車樂園。環保老友話同鄉議局聯手，就係希望近排成日講環保嘅曾蔭權，真係做啲嘢，訂定清晰啲保育政策。