世界盃下月中先開鑼，不過一班藝人就喺賽前出席ViuTV嘅世界盃宣傳活動，率先挑戰與足球有關嘅遊戲。羅家英準備帶埋太太汪明荃飛到俄羅斯欣賞球賽，佢話睇好「黑馬」比利時。

家英哥話體能好作為足球員的先決條件，佢同剛宣佈陀B嘅林芊妤(Coffee)鬥長氣，唱開大戲嘅家英哥竟然輸咗，家英哥解釋﹕「女人向來都好長氣，有名你講『長氣婆』。我以前長氣啲，不過做完手術後，肺細咗，所以冇以往咁長氣。」

至於兩位好友兼波友梁漢文同許志安則鬥「的波」，許志安以六球之差贏咗梁漢文。梁漢文話﹕「着錯衫累事啦，我今年就睇好法國捧盃。」支持阿根廷多年嘅許志安，希望見證美斯能拿下大賽獎盃。

最後，何傲兒與黃德斌就鬥快「補給」，佢哋要挑戰鬧快飲汽水，見二人飲到面容扭曲，事後稱因汽水有氣，快速飲落肚時比較辛苦，最後由黃德斌勝出。

精選娛聞，喺晒《娛果》
http://fb.com/appledailyent