當年今日
關於我們

【房協●專訪】疫情下資助員工買口罩 黃傑龍最自豪團隊精神

蘋果日報 2020/03/30 00:21

房協黃傑龍大內總管香港房屋協會建屋

房協行政總裁兼執行總幹事黃傑龍明日(31日)就last day,要離開工作了26個年頭的房協。訪問當日,其辦公室已經「執得七七八八」,他笑言,多年來每日定時返工,不定時放工,即將退休「但係都唔捨得」。

黃傑龍94年加入房協,由物業管理部區域經理,一路晉升至行政總裁,成為房協的「大內總管」,最令他自豪是房協擁有良好管治架構、關懷文化及團隊精神,「唔係間間機構都有,員工上下一心,同心協力做好一樣嘢。」他原本計劃退休後到外地探望親友,閒時就打高爾夫球,但疫情下都響應政府呼籲,盡量減少社交活動,留家「防疫」。

黃傑龍畢業後第一份工作是在政府擔任行政主任(EO),「我哋嗰屆其實得幾個人入政府」,但至87年有私人機構「挖角」,他就離開公務員行列,轉換跑道從事物業管理的工作,其後更被獵頭公司「睇中」,加入房協擔任物業管理部的區域經理,甚至晉升至行政總裁,一做就26年。

他直言,在房協「打工」有別於政府及私營機構,房協是公營機構需自負盈虧,除了要「睇住盤數」,也要顧及社會責任。最令他自豪更是房協擁有良好管治架構、關懷文化及團隊精神,如近月武肺疫情下,管理層向員工發放的第一個訊息,「就係員工嘅健康係最重要」。

房協早於今年1月中已向每名員工派發一盒50個口罩及搓手液等抗疫產品。農曆新年前後,全港搶購口罩,房協口罩也供不應求,為「百分百員工都有口罩」,員工可自行在市面購買,並採取實報實銷的政策,「要確保啲員工有口罩用,我哋供應唔到畀你,都鼓勵員工出去買。」
「夾屋」一役:
業主問我哋有咩方法幫到佢
26年來黃傑龍都遇到不少挑戰,最難忘是「夾心階層住屋計劃」一役。90年代初政府委託房協興建夾屋,並以優惠價格發售予夾心家庭,「93、94年賣樓花,用市價60%賣啲單位,但到97、98年樓市大跌,私樓市場都跌咗三成」,當時將軍澳更有私人屋苑呎價由8,000多元跌至4,000多元,「嗰時跌得好勁,我印象好深刻,有啲夾屋業主嚟收樓,見到佢哋好苦惱、好唔開心,因為嗰時私樓都係6折價錢⋯⋯如果係自己住其實冇咩大關係,當然我都明佢哋好唔開心,但有一班夾屋業主對我哋好反感,覺得我哋引誘咗佢哋買樓,又有班(業主)成日上來搵我哋傾,問下我哋有咩方法幫到佢。」

他直言,每當房協推售資助房屋,也會提醒申請人置業是重大決定,除了有住屋需要,也要量力而為及預防樓市波動,「買家最緊要量力而為,有冇能力供?唔好因為見到人哋個個買,覺得有機會炒樓就去買,買咗單位都要預防樓市波動。」
武肺未影響樓價:
依家大家有能力好多
武肺疫情下,樓市未有如沙士般暴跌,他相信,因為大家已經歷過沙士,「似乎大家都覺得疫情過去後,樓市仍然會穩步上升,所以好多業主未肯減價賣樓,同沙士嗰轉唔同,大家劈價,當時大家未經歷過」。他又稱,與沙士當年不同,要成為業主都要經過不同壓力測試,「依家大家有能力好多,唔會突然斷供⋯⋯入場做業主都要經過好多門檻,好多壓力測試,買樓前又要做銀行壓力測試,杜絕一班揸住5蚊雞想買500萬嘅人。」

記者 譚靜雯

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此
empty
黃傑龍指26年來遇到不少挑戰,最難忘是「夾心階層住屋計劃」一役。 李子健攝
empty
武漢肺炎疫情下,黃傑龍指房協採取實報實銷政策,確保員工有足夠口罩防疫。 李子健攝