當年今日
關於我們

【懶理被問價】清純「牛雜妹」孖索家姐三亞旅行 激罕晒比堅尼照

蘋果日報 2017/11/26 18:25

泳裝牛雜妹李美琪家姐Charlia

落選港姐「牛雜妹」李美琪早前自爆被大陸人喺社交網問飯局過夜全包價,由50萬人仔加到200萬利誘,但牛雜妹都不為所動。(相關新聞﹕ http://bit.ly/2AaqEhf )
其實牛雜妹向來都唔係走性感路線,入行兩年從未試過着泳裝見人。今日佢竟然破天荒,喺ig貼咗去三亞旅行嘅泳衣相,雖然都係保守嘅一件頭款色,好似冇乜睇頭。但本住尋根究柢嘅精神,入埋同行家姐Charlia嘅ig睇睇,原來牛雜妹姐姐一樣咁索,仲貼咗兩姊妹合照,唔小心出賣咗妹妹嘅三點式爆乳泳裝添。
牛雜妹今日接受《蘋果》電話訪問,佢透露比高峰期瘦咗8磅,所以去到外地旅行先夠膽着泳衣,佢話:「家姐影相角度好好,我用手遮住肚腩仔,所以唔使執相,反而要tone吓啲皮膚顏色。(你家姐都好索,有冇諗過入行?)佢出名身材好㗎,但佢話唔善於表達,寧願做幕後支持我。」
問到今次男友、米芝蓮糖水舖太子爺Jill有冇同行?牛雜妹話:「冇呀,可能出年2月生日會一齊去,計劃緊。」今次泳衣激罕曝光,驚唔驚再招人問價?佢話:「冇得驚,入行預咗,只要我拒絕就得。」
更多娛聞,喺晒《娛果》
http://fb.com/appledailyent