女人失婚唔係世界末日，只要有獨立能力，一樣可以活得精采，43歲陳煒（煒哥）喺08年同台灣富商顏志行結婚，仲宣佈息影。不過喺12年復出兼過檔無綫再博殺，原來同年佢秘密同老公顏志行離婚，多年嚟喺人前扮恩愛，密冚離婚一事，甚至喺去年大台節目《煒哥的味道》中，煒哥搵嚟顏志行做嘉賓，直至早前驚爆「老公」戀上台灣歌手鄭雙雙，搞到鄭雙雙無啦啦變咗「小三」，煒哥先肯承認已離婚五年。（相關新聞： http://bit.ly/2i14oxA ）

回復單身嘅煒哥自力更生，喺大台密密拍，近日仲同岑麗香同黃浩然為劇集《果欄中的江湖大嫂》趕戲，日日chur爆咁滯，不過工作帶嚟動力，煒哥越忙越開心，近日仲有周刊爆煒哥大把market有人追。

《蘋果》日前約5點左右，喺尖沙嘴撞見煒哥單拖買咖啡，淡妝嘅佢入咗舖頭好自然咁排隊，排龍尾嘅煒哥發揮香港人本色，邊等邊拎住電話玩語音通話，佢仲不時會心微笑，唔知佢同邊個傾緊呢，唔通係傳說中嘅追求者？Anyway，煒哥等咗大約10分鐘，其間有唔少客人認得煒哥，而佢都好大方，報以微笑。輪到煒哥拎咖啡，原來佢買咗兩杯，仲行咗去加連威老道附近上七人車離開。堂堂煒哥買兩杯咖啡做外賣妹，唔知請邊個飲呢？

呢個問題就等煒哥答番啦！佢今日回傳媒時話：「如果喺尖沙嘴撞到我，多數係買完咖啡去location開工，仲有幾日埋尾，冇得瞓。」因為要捱眼瞓，所以煒哥幾乎開工就要飲咖啡提神，日日趕戲就要日日飲，佢話打孖兩杯，唔係自己飲晒，其中一杯係請助手飲喎！