前首席大法官楊鐵樑英文頂呱呱係人都知，估唔到佢搞gag都有一手。話說楊官噚日出席佢套《品味英語》新書發佈會，八方諗住楊官教英文，離不開叫人勤加練習，點知佢突然喺台上放個冷笑話，搞到全場捧腹大笑。
楊官話中國人講英文，經常用中文直譯，鬧出唔少笑話。佢話有個美國人喺北京做生意多年，有日出街碰見對面屋個中文老師同佢老婆，美國人禮貌地用英文同老師問好，仲讚佢太太漂亮。中國人諗住客氣回應「哪裏、哪裏」，點知佢用英文直譯：「Where！Where！」美國人聽見竟然當真，即場指住個中國人老婆話呢度靚嗰度靚，結果當然鬧出一場笑話。
難得楊官開腔搞gag，唔少仲係真人真事。楊官話有個朋友喺美國買番梘，「番」，外國是也，外國生產嘅番梘同中國唔同，佢朋友就走去雜貨舖問人，"Iwantforeignsoap."。話晒都係自己朋友，楊官皮笑肉不笑咁話：「番梘嘛，foreignsoap，咁個舖頭佬喺櫃架度摷咗一輪，就畀咗嚿梘佢，MadeinChina，咁美國人嚟睇，中國嘢咪係外國做囉」。

胡定旭自謙要學英文

中國人講英文搞出咁多笑話，真係要跟楊官好好學習。佢話香港人經常強調英式同美式英語，根本就多鬼餘，「我同你傾偈，你理得我東莞音呀汕頭音呀，總之差唔多廣東音就算」；佢話學好英文來來去去都係講「四多」：聽多、睇多、講多、寫多，可惜香港環境好難做到，同學仔少接觸英文，「聽多啲冇機會聽，寫多啲佢冇機會寫，講多啲又冇機會講，睇呢，佢又費事，掛住打機」。講番楊官套新書《品味英語》，輯錄佢喺香港電台教英語嘅節目，共分三冊，每本88元；同場亦有佢媳婦楊余夏卿出版嘅cookbook《煲煲好》，兩人著作嘅版稅收入，將全數捐畀香港紅十字會作總部重建之用。
醫管局主席胡定旭噚日用1,000蚊買咗楊官三冊新書，仲第一個搵楊官簽名留念。佢懶謙咁話自己英文渣，要買番本學吓嘢，仲話唔會亂讚人靚女喎。八方問佢點解唔買埋楊官媳婦本烹飪書，肥胡就指住自己個大肚腩，好真誠咁話：「咁肥，仲買？」

mailto:[email protected]