【新增內容及影片】
「成功男人」、「人生贏家」呢啲綽號通通都可以用喺愛國者星級四分衛暨準名人堂成員！布拉迪（Tom Brady）身上。五奪NFL超級碗破盡紀錄之餘，場外仲有位靚爆鏡超模老婆Gisele，做男人做著佢，夫復何求！

先講場內！家陣球壇，80後已經畀人話老，70後可能會畀人話：「乜仲未退休嘅。」但布拉迪呢位NFL70後男神，憑住一次又一次嘅神級表現，證明咩叫老兵打不死！39歲嘅佢喺香港時間禮拜一，帶領曾落後25分嘅愛國者，喺NFL Super Bowl史上首次加時，反勝亞特蘭大獵鷹34:28封王。

呢場波嘅意義表面睇係紀錄之夜！布拉迪五奪Super Bowl，成為NFL史上贏超級腕次數最多嘅四分衛。今仗雖然被偷截咗一次，但全場仍貢獻兩次傳球達陣。仲有，佢今場62次傳球完成咗43次，傳球共466碼，全部都係超級碗新紀錄。生涯第四次獲選為超級碗MVP，又係新紀錄！

喺咁輝煌嘅戰績背後，其實係講緊一個永不放棄、打不死嘅故事。布拉迪成為今時今日嘅準名人堂成員之前，其實只係一位球探唔睇好嘅大學四分衛。Touchdown Tommy喺00年嘅選秀報告大概係咁：「慢、瘦、手臂力量唔夠。」簡單啲嚟講，就係一個字：「渣！」卒之，Brady喺00年NFL選秀以第6輪、第199籤被愛國者揀中。但係有一點球探係睇唔到嘅，就係Brady心中對贏波嗰種執著！

01/02球季，Brady由超級大後備升呢至正選四分衛，即係幫愛國者奪得隊史首座Super Bowl。之後喺03/04、04/05同埋14/15球季幫球隊封王，呢四場Super Bowl最大分差都只係4分！今日呢場更係大比數落後25分嘅絕境下反勝，呢種永不放棄、打不死嘅求勝心，喺近代美國體壇，相信只有「波神」米高佐敦（Michael Jordan）同埋湖人名將拜恩（Kobe Bryant）可以比擬！

講埋場外，Brady女伴有好多（請見另文： http://bit.ly/2kxFOFJ ），但至多球迷認識嘅呢，一定係現任老婆：超模Gisele！呢位嚟自巴西嘅靚女，芳齡36，身高1米8，曾幫著名內衣品牌Victoria Secrets行catwalk。可以令一位傾倒生嘅靚女幫自己生一囝一女湊個「好」字，證明Brady嘅魅力係幾勁！