李克勤喺紅館舉行一連9場嘅《慶祝成立30週年演唱會》，噚晚終於圓滿結束，老婆盧淑儀、楊受成夫婦、霍汶希(Mani)、楊政龍、蔡卓妍(阿Sa)、徐濠縈、黃偉文(Wyman)、泳兒等捧場。Wyman、阿徐、盧淑儀等一班人都響應着潮款睡衣到場睇騷。

去到尾場，果然放好多，克勤喺每個環節都表演得好好，而特別嘉賓環節，佢喺台上講：「呢part大家都知係嘉賓環節，呢個嘉賓聲色藝俱全、樣靚、身材魁梧，受到萬千寵愛在一身，唯一缺點就係故意忘記歌詞，如果每個人身邊都有一個貴人，嗰個人就係佢。」跟住克勤唱出《沒有你贏了世界又如何》，同時着住藍色西裝、藍皮鞋嘅校長譚詠麟就升上台，兩人擁抱。

手上拎住個盆仙人掌嘅克勤話：「大家都知如果係女嘉賓，我係送玫瑰，但我唔想令阿倫懷疑我30年前嘅性取向有改變，所以搵咗我手上嘅呢個盆裁，代表阿倫一柱擎天嘅歌壇地位。」阿倫帶笑反問：「你真係肯定，呢棵又爛又開叉，你小心啲喎？」

當克勤讚阿倫工作認真，早一日就去紅館綵排時，阿倫就笑話：「我身上呢套藍色西裝係十年八年前，估唔到仲着得番，應該係受惠之前同阿Sam嘅演唱會。」阿倫亦都讚克勤有所改變，成熟大個咗，掌握舞台更有能力，克勤開心笑話：「我都係跟你學。」而阿倫個人solo，就冇唱自己嘅歌，揀咗克勤嘅《一個人飛》，真係誠意十足。