《ESPN》報道，NBA球隊快艇嘅主場靚位將會有變動，肯花錢嘅有錢人可以「升呢」upgrade去全新嘅「星級場邊座位」，坐正喺球員後備席嘅隔離。

報道話快艇咁做嘅話，首先就要將計分檯斬開，再增加八個「星級場邊座位」。快艇方面未曾公怖呢八個超靚位嘅門票價錢，不過消息人士就話，每個「星級場邊座位」會索價175,000美金，即係大約136萬港紙。大嗱嗱百幾萬睇場波，咁到底會包啲咩呢？除咗可以入到快艇嘅會所之外，亦都會有侍應將飲品同食物送去你個位，唔使自己行去買，唔少得當然有代客泊車服務，出入球場仲可以行VIP通道。

快艇方面嘅消息指依家買緊場邊位季票嘅球迷會有「星級場邊座位」嘅優先購買權，之後先會拎出嚟公售。