草蜢於元旦日敗於軟硬手下、失落叱咤組合金獎，三子早前喺記招上仲話07年目標係打低軟硬奪回金獎，實行觀塘青蜢惡鬥高山青龍，因為咁辣㷫軟硬，搞到要擺和頭酒。
草蜢噚日喺九龍城為將於下月1號至3號舉行嘅演唱會排舞，軟硬踩場之餘，仲講笑咁話會以叱咤組合金獎嚟換取上台機會，草蜢就送上戰衣回禮，估唔到身形較肥嘅葛民輝都着得落，不過就笑三子嘅衫有膊頭墊過晒時。

網上拍賣金獎

對於軟硬話以金獎換表演機會，傑仔笑指：「我哋拎唔起咩？不過兩隊組合都係實至名歸。」阿智就講笑咁話會將個獎擺喺網上拍賣，林海峰亦不甘示弱話：「咪畀佢囉！個獎好平啫！但我最喜愛嘅組合獎畀唔到，因為係人哋（歌迷）畀我哋，畀佢哋都冇意思。」
去年軟硬開演唱會嗰陣，草蜢做嘉賓被玩，難怪噚日阿智話：「我哋已經布下天羅地網，埋伏咗幾百人喺現場，如果唱到唔走就搵保安搬佢哋。」林海峰就話今次堅持要做嘉賓：「唔理做觀眾，或者做派飛人員、歌迷都要上台，殺佢哋個措手不及，甚至唔去！」
日前有雜誌話林珊珊患乳癌，最感動係林海峰陪伴去醫院，珊珊日前澄清話只係子宮生纖維瘤，林海峰就話：「總之林珊珊心口兩座山穩如泰山，只係有啲人嘅筆有『語癌』寫錯。」