S老總賜飯，電召左丁山過尖沙嘴。上到美麗華酒店「東宮」，S老總與女朋友K已經在座。女朋友者，女性朋友也，唔好誤會。K小姐三十年前跟過S老總做記者，𠵱家已在多倫多大機構做咗總經理。一坐低，就見到好姨薛家燕經過，直入貴賓房，跟着有唔少人出出入入貴賓房，然後見到公關大姐大行出嚟，真係巧合到極。問大姐大：「入邊搞乜東東？」大姐大話：「馬浚偉出新書吖嘛！」左丁山問：「馬浚偉係邊個？」
S老總、K小姐、大姐大當堂笑到合唔埋口。K小姐話：「我喺多倫多都睇過馬浚偉啲劇集啦，乜你住得咁背？」唉，都係「有線」之害，晚晚睇有線，邊會見到一個明星叫做馬浚偉！

K小姐來自多倫多，問佢當地報壇是否好景，K小姐話：「幾熱鬧㗎，星島、世界、明報爭崩頭，近年來自大陸嘅移民最多，佢哋多數睇《星島》，因為佢哋覺得《世界》太台灣、《明報》太香港喎，不過星島過往幾年喺周末隨報附送《星周刊》，內容全部來自《壹週刊》，現在已經改為由《東周刊》提供，讀者感覺唔一樣。」
北美華文報壇夠熱鬧，本地記者移民過去，都有一線希望—搵工。聽講自從《多倫多星報》收購當地《星島》之後，《星島》啲記者入埋工會，享受更多福利，工作時間縮短咗，羨慕死隔籬。但係加拿大人話事，有時冇乜華人市場嘅觸覺，唔會明白馮寶寶嘅亞視劇集《萬家燈火》點解咁受歡迎，K小姐話電視台播《萬家燈火》，廣告多到爆燈，賺到笑！