西環正街Tesla連撞5車再鏟行人路 險撞路邊肉檔 職員：「腳都軟埋」
蘋果日報 2020/11/10 00:51
西環正街連環相撞Tesla
下午3時47分，西環正街對開，發生6車連環相撞，其中一部Tesla私家車，由女司機駕駛，在燈位落斜期間，高速先撞開路面兩部私家車，兩私家車被推前再撞另外兩部私家車，Tesla繼而失控向前猛衝，其間撞向另一部政府七人車，七人車司機扭軚鏟上行人路，險撞正街24號源興肉檔，Tesla亦直鏟行人路，行人路上消防水龍頭亦遭撞至塌下，幾乎撞向26號的「新界佬」肉檔門口。兩肉檔職員險遭捲入車底，驚險萬分，而正街兩邊佈滿肉檔、菜檔及店舖，街坊熙來攘往，意外未有造成嚴重人命傷亡，可謂不幸中之大幸，意外中僅其中一部七人車的女乘客頭痛不適送院治理。
有車Cam片段拍攝到事發一刻，可見當時黑色Tesla停泊路邊，突然Tesla向左衝前，撞向前方和旁邊車輛，惟餘勢未止繼續向前。片段所見，當時Tesla正閃着死火燈，未知是故障還是司機打錯燈號。
當時站在水龍頭後方的肉檔男職員黃先生表示，如果沒有兩部私家車及水龍頭為他擋住去勢，他便首當其衝被Tesla撞倒，他頻呼好彩，嘆謂「差啲瀨嘢！我依家個心仲好驚，腳都軟埋！」
而另一名目擊者劉先生，事發時聽到巨響，查看下已見意外發生，據他了解，當時Tesla以高速100公里衝落斜路，「條路其實好窄，兩邊又係肉檔、菜檔，好多人，當時燈位有好多車停喺度等轉燈，Tesla突然失控撞開啲車，再失控衝上行人路險撞肉檔。」
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！