有「天然美女」之稱嘅韓國女星孫藝珍，早前來港出席代言品牌marier活動，事後抽空接受本報獨家專訪，分享孖台灣「大仁哥」陳柏霖拍攝華語新片《壞蛋必需死》嘅幕後故事。對於近期圈中爆出多對跨國戀情，珍妹笑言唔抗拒，仲話自己要先學好中英文，暗示一切皆有可能。

出道15年嘅珍妹，早期憑《假如愛有天意》、《抱擁這分鐘》等催淚電影於亞洲為人熟悉，不過近年佢就轉型拍武打場面比較多嘅電影，如《海盜》及《壞蛋必須死》，佢坦言：「初出道時係20出頭嘅新人，加上當時觀眾偏好斯文、溫柔型女星，我可以選擇嘅戲路同角色唔多。」不過現年33歲嘅佢就話：「近年社會風氣同觀眾嘅喜好改變咗好多，更多人接受女強人嘅角色，而且我想試唔同類型嘅作品，如果要我再拍返以前同類型嘅作品，我會覺得悶。」

今次珍妹孖陳柏霖拍攝《壞》片，珍妹大讚對方非常勤力：「陳柏霖有好多韓文台詞，埋位前佢非常用功練習，我哋私下亦有互相指導對方嘅中、韓文。」雖然珍妹多次表示要保密新片嘅角色設定，不過提到日後想挑戰演媽媽角色時就漏口風話：「雖然我未結婚，不過仍可以扮演媽媽一角，就好似今次於《壞》片中都有類似嘅設定。」佢仲話之後想挑戰啲講女性友情、跳舞等唔同類型嘅作品。

珍妹於訪問中又表示非常鍾意《花樣年華》、《甜蜜蜜》等港產片，坦言張曼玉同梁朝偉都係佢嘅偶像，佢更對張曼玉讚不絕口：「張曼玉嘅演技非常好，單係一個望男主角背影嘅眼神，已叫我非常難忘，係我嘅學習對象。」

珍妹對上一部劇作已係前年嘅《鯊魚》，問到短期內會否回歸公仔箱，佢即擰頭：「拍劇嘅速度太快，好花精力同體力，要慢慢考慮。」而鮮有演出綜藝節目嘅佢亦坦言唔太喜歡上節目，解釋：「唔太想向觀眾展示現實生活嘅自己。（咁對於要素顏演出呢？）都唔想。」

談到近期圈中爆出多對中韓配，珍妹笑言自己都接受跨國戀，表示：「不過我要先學好中文及英文，因為溝通好重要。」暗示只要跟對方溝通到，國籍唔係一個問題。