本地大學為迎合社會之學歷需求，辦咗不少「自負盈虧」嘅文憑及非研究之碩士課程（碩士MA多是上課，交功課，唔駛做研究嘅；哲學碩士M.Phil就係教資會付款津貼之研究生課程），呢類自負盈虧文憑及碩士課程大受歡迎，因而各大學加加埋埋，賺咗唔少錢。賺錢條數好似好易計，學費收入減除宣傳推廣成本，教師授課成本，課室租金，講義成本等等咪係囉。但仔細研究下，大學課室係教資會或政府撥款興建嘅，教師（教授）薪酬係公帑支付嘅，教授拿了薪水，如何將佢嘅時間成本在學士課程、哲學碩士課程與碩士課程三方面劃分？大學招牌係收生保證，「招牌成本」（brandcost）又如何劃分？睇落都幾煩，各大學盤數要分拆得非常細緻，否則幾容易俾審計署將軍！
左丁山並非因此反對大學賺錢，大學冇錢嘅話，最終受害者一定係學生與研究計劃。有議員質問大學賺錢係為乜，幾唔用腦，大學係非牟利機構，有校董會及廉署睇實，大學賺咗錢唔會入到私人口袋，留在大學做儲備，始終都係用於教學與研究嘅啫，香港本地大學愈係多錢，香港愈係能夠吸引世界人材來港，建設未來香港。
柏克萊雖然呻窮呻到樹葉落，佢嘅每年預算仍然高達二十三億美元（比幾年前已削減十億美元），相等於一百七十九億四千萬港元，比較香港八間公立院校之三年四百四十二億港元，一間柏克萊每年用錢多過香港八間（中大、港大、科大、城大、理大、浸大、嶺大、教育學院）每年加埋。可以咁講，香港每間大學用錢相當克己，但國際排名有番咁上下，納稅人嘅大學投資回報率相當高。