陳茵媺（Aimee）今日到主題公園支持無飲管運動日，老公陳豪十分支持Aimee出席相關活動，皆因Aimee在家中除了主婦一職外，更被稱為環保大使，教育下一代着重環保，由日常家居生活開始。

Aimee認為環保是愛錫小朋友的做法之一，她解釋：「未來世界就係由佢哋主宰，從小開始教育令佢哋成為習慣，反而大人要作出改變就會唔適應，細路容易改變，我喺屋企會以身作則響應冇膠、冇飲管，自己環保意識都係從媽媽身上學習，出街會拎環保袋同飯盒。」

Aimee透露3位子女分別為3、4及5歲，日漸長大開始意識環保，不時互相提點，並說：「最初都唔肯，因為BB出世時候都習慣用飲管，但我會諗辦法o氹佢哋，其中一個方法可以走冰，飲料可以多啲，佢哋聽到就會接受，到現時為止佢哋都好乖，習慣咗。」

Aimee連日出席活動搵外快，透露掛念幕前拍戲感覺，她說：「傾緊電影，自己好想表演一個角色，但做咗媽咪之後時間就要更多安排，老公好支持我，佢話OK，知道我有夢想，我亦同佢講唔公平，你可以工作！由我未生第一個BB時候，我都話會返去幕前，只係難就時間，我希望盡快可以喺幕前見到大家，唔單只係活動上。」Aimee一直對子女親力親為，幾乎沒有私人時間，到小朋友放假時又不捨得外出，難以抉擇，期望遇到好對手可以復出。

------------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9