當年今日
關於我們

【入圍金像獎】打畀余文樂先過阿仔 曾志偉:最期望同個仔一齊攞

蘋果日報 2017/02/07 18:21

曾志偉金像獎余文樂

曾志偉今日喺銅鑼灣出席「鵬」日本料理開幕禮,同場仲有相撲手白鵬翔擔任嘉賓。
志偉憑《一念無明》入圍金像獎最佳男配角,表現得十分開心,佢話:「多謝,最開心個仔都有提名,《一念無明》咁多項,我第一個唔係短訊畀個仔,係傳畀樂仔(余文樂),我搵佢拍時問佢希唔希望提名?今次有機會,快啲拍,佢好用心,金馬失落咗好可惜,今次係主場就唔同,恭喜佢呀,真係演得好好,知道佢上次金馬落選咗有失望。第二個先打畀個仔,《七月與安生》有12項。」
被問到囝囝曾國祥比佢仲勁?志偉話:「仔威過老竇梗係好,我都有恭喜《一念無明》導演,提名最佳同新晉導演,呢半年好豐收,太多好消息,金馬獎、中馬、又金像獎提名,好開心。」問佢對自己有冇信心?志偉話:「全部都係老友,有提名已經好開心,邊個攞都冇所謂,我一定會出席,最期望同個仔一齊攞更好。」