龍小菌、邵子風同馮凱淇今日去到深水埗擔任嘉年華揭幕嘉賓，啱啱同外籍男友甩拖嘅小菌，預計要過lonely Christmas，佢指跟舊愛各方面都夾，唯獨性格不合導致分手，現時寄情專心寫歌，問到有冇追求者？佢話：「身邊都係band友，一係結咗婚，一係賣剩蔗。」佢計劃報考埋博士課程，未考慮做番老師，佢笑往話：「同佢（邵子風）緣份就完但約未完，早前又拍咗廣告，慳啲使夠用，希望下年勤力啲多啲工作見大家。」

邵子風由208磅減到162磅，佢指一來為健康，二來見女友蝦頭越嚟越弗，開始有中年危機感，佢自認樣衰、肥、無錢兼懶，身邊同佢緣盡嘅小菌忍唔住話基本上無樣好。邵子風更指個個月都有人追蝦頭，但唔明為何他人得唔到手，唯一可能自己高度取勝，佢話：「我冇乜優點，我諗係同我打茄輪唔駛趷腳。」佢仲話日前見到呂方，對方仲比自己高半吋，對方講咗句喺香港細粒先紅，除咗周潤發。

更多娛聞，喺晒《娛果》
http://fb.com/appledailyent