楊千嬅今日孖住陳慧琳（Kelly）喺尖沙嘴出席護膚品牌活動，並幫護苗基金籌得100萬善款。

講到夏天到，Kelly話鍾意帶住兩個小朋友去游水，仲笑大仔已經曬到好黑、好man咁話，問Kelly唔怕曬咩？佢話：「我會喺室內遠望佢哋，會帶埋望遠鏡。」

至於暑期節目方面，兩位媽媽都搞盡腦汁幫小朋友計劃，千嬅就打算送囝囝Torres去其他家庭屋企過夜，想佢學吓守規矩同自理能力，佢話：「每個屋企都有家規，佢去到要跟從，我想搵Kelly㗎，個仔又鍾意同哥哥玩，等哥哥教佢學啲好嘅嘢。如果佢乖乖哋兩日都好勁。」

千嬅又話唔會唔捨得，亦歡迎其他朋友仔去佢屋企寄宿。而Kelly就好歡迎，仲話到時可以放低佢哋由老公睇，佢就同千嬅出去shopping。

問到佢屋企有咩家規？Kelly就話：「冇㗎，我好寬，家規係一定要除鞋，同埋由細到大我都唔開電視，有一次我開咗諗住娛樂吓，點知大仔走去熄咗佢，大仔o依家似管家。」