嘟姐鄭裕玲決定今年港姐冠軍嘅命運，由於最後一票太重要，嘟姐都有一刻猶豫，有試吓問現場觀眾意見，佢話：「因為現場睇同電視睇有啲唔同，我心覺得係5號，咁現場都好多人舉5號，你哋睇番啦，我冇數，我覺得5號幾好，咪畀5號囉。成晚流程就係咁。我檢討過我有冇做錯㗎？諗番掉轉唔跟自己心，唔選5都會俾人話。另聽講仲有個大熱(8號伍樂怡)，咁如果另一位入最後兩強嘅話，咁當然又唔同，但並唔係我嗰part出事，係跟公司，如果你哋鍾意其他賽制，咁等出年囉。」

唔少網友都覺得亞軍1號何依婷靚啲，嘟姐話：「我都有同亞軍講唔好意思，你差少少，題外話，張曼玉當年都係亞軍，但當刻我覺得係5號好少少，各方面都平均啲。其實私下仲有幾位評審同我講﹕『幾驚你唔係選5號』，各人睇各人心水啦。」

嘟姐更大爆部份佳麗唔化妝個樣同化妝差好遠，佢話：「冇化妝都係o架……唔同樣，哈哈。有啲素顏，有啲戴眼鏡四眼龜咁樣，但化晒妝好行咁又扣分喎，但冇人戴大眼仔，算係咁。」

對於有網民話「嘟姐玩晒」，嘟姐直言好難啱晒每個人心水，佢話：「明白有啲網民會話﹕『你有咩咁巴閉』？你選嗰個唔係我心水。記唔記名投票冇所謂我對自己負責。我覺得咁，你哋選老婆老公，你覺得佢perfect就得，咁我係校長，我可以選擇。」