「Super Mum」陳茵媺（Aimee）喺7月一拖三返加拿大探親兼帶仔女去放暑假，爹哋陳豪要留港做嘢，四個心肝寶貝喺加拿大成個月，喺上月中返港，為開學做準備。(新聞連結： https://bit.ly/2vHJ4Vz )

話晒成個暑期都冇乜陪小朋友，所以陳豪曾經講過話會計劃一個family trip（家庭旅行），喺呢個trip未出發之前，當然要繼續返興趣班，唔可以唔理學業。日前下晝5點幾左右，見到陳豪揸住架7人車喺淺水灣出現，不過佢唔係同老婆行沙灘拍拖，而係送阿仔返playgroup。

陳豪單手抱住細仔，而細仔伏咗喺爸爸膊頭有啲扭計，但係陳豪好好耐性咁o氹阿仔，之後佢哋上咗去商場3樓一間類似係club house嘅地方，嗰度除咗有餐廳，仲有好多唔同類型嘅課程俾啲小朋友，大約過咗2個鐘頭左右，陳豪又抱住個仔落樓上車，之後又好快咁揸車去商場側邊啲上落車位。

原來陳豪同Aimee兵分兩路，太太同外傭姐姐負責同大仔同囡囡去上堂，而佢就負責帶細仔，仲要開車接埋老婆仔女，因為嗰度有唔少旅遊巴停車上落客，所以嗰陣有旅遊巴響按，Aimee都揮揮手示意唔好意思，之後再安頓仔女上車，再開車走人。

精選娛聞，喺晒《娛果》
http://fb.com/appledailyent