資深歌手莫旭秋（Joe）噚晚喺尖沙嘴文化中心舉行巡迴演唱會，請嚟區靄玲同許秋怡等擔任表演嘉賓，Joe演唱會中同區靄玲合唱粵曲《香夭》，區靄玲話自細都係聽粵曲長大，好鍾意聽，但要佢唱都有少少難度，佢透露嚟緊會出碟，所以一直都要保持最佳狀態，唔可以放肆，保持健康嘅生活，仲要犧牲自己鍾意嘅食物。提到舊愛羅浩楷不幸患上怪病，區靄玲都有留意，佢話：「都有睇電視，我哋一場朋友，都好奇怪點解會有呢個怪病，咁多年前嘅嘢，冇嘢嘅，希望佢快啲好返。」問佢有冇打電話問候對方？佢話：「唔方便，自從一別都冇再見，冇謂掀起任何問題，希望佢快啲好返，幫我問候佢。」

而Joe就話今次係佢嘅第6次巡迴演唱，非常高興，今次加入埋粵曲，仲會有少少搞笑嘅演繹，雖然歌詞係有啲難記，但都難唔到佢咁話。