「金鱗豈是池中物，一遇風雲便化龍。」

這兩句經典金句，大家耳熟能詳，但其實不是出自馬榮成，而是出自術數大師、「鐵板神算」董慕節之口，他早年為馬榮成算命作的批語，一語成真。董慕節在上一輩人威名鼎鼎，他外孫、29歲張存華（Emil）卻冇繼承衣缽，美國留學回港後，改走截然不同的體育路，想為體育出一份子，曾為歐鎧淳、胡子彤做經理人，又跑去做講波做NBA籃球主持，「我想話畀其他人聽，香港嘅sport show有好多過癮嘅地方。」公公批他可以振家聲，他則深信知天命，更要自強！

29歲陽光正氣的「華Dee」張存華，在銅鑼灣學打泰拳，預備正式打比賽。2017年因和麥明詩傳出緋聞，被起底來自命理名家、「鐵板神算」董慕節外孫，「我真係冇追過麥明詩，飲過吓咖啡係有，如果有追，好多人見到啦！嗰次新聞一出，遠在美國嘅朋友都搵我，單新聞係比我做體育主持訪問，大100倍威力。」

【金庸寫小學紀念冊】

「鐵板神算」董慕節上世紀在圈中名聲顯赫而低調，翻查紀錄，出現過的星級客戶名字，有：李嘉誠、倪匡、黃霑、張國榮、徐小鳳等等，更傳有內地領導人。「細細嗰時已經feel到，因為食食吓飯，會叫『喂，走啦，入房喇。』原來係有啲VVIP要上嚟。」家中常有巨星名人到訪，幾歲由李連杰抱住，紀念冊也是金庸題字「前程遠大、希望無窮」，至於外界最熟嘅兩句「金鱗豈是池中物，一遇風雲便化龍」，他說：「當時黃玉郎同屋企好熟，成日拜候公公啦，介紹咗馬榮成嚟，後來我入戲院睇《風雲：雄霸天下》，媽咪話，你要記住呢句，係媽咪寫畀馬榮成。」

【美國飽受歧視】

在香港開心過童年，張存華去到美國讀大學突然變了天，華人學生備受歧視，亦令他雖然苦讀金融，畢業後卻改投體育之路，「美國唔係樣樣咁文明，紐約都有少少歧視，何況印第安納州？喺大學俾人掟波呀、俾人寸呀，去到最後一年，我哋全華人隊勝出咗一個重要嘅本地聯賽，先得到人哋嘅尊重。但係，報章仲係形容我哋係Asian American，華裔美國人，其實係唔啱。呢樣嘢係令到我要做體育行業，做啲新事出嚟。」因打籃球得到身份認同、文化認同，張存華希望提升運動員的社會形象、商業認受性，2015年回港後，做完運動品牌公關，再做港台體育主持人，跑新聞、做NBA評判等，更負責香港頂尖運動員，如：胡子彤等的經理人工作，「manage廿幾個運動員，嗰時個待遇冇得彈，但始終我後生，未夠經驗，湊住佢哋亦真係好辛苦。」

【廣東話講波好過癮】

搵錢少，挫折多，張存華坦言當時自覺好「兜踎」，幸好個人正面上進，思前想後决定先做好自己，「公公在我最迷惘時，講咗兩句：『勇敢創新紀，立志振家聲』做人一定要自強，我仲想話畀其他人聽，香港啲Sport show有好多過癮嘅地方，就算有幾少人睇NBA嘅廣東話評述都好，你肯做好功課，一樣可以建立到自己嘅粉絲。」

聲線不夠靚？講得激情活潑些；項目專業不足？逐樣學，籃球、拳擊、游泳、劍擊；廣東話講波搞定，張存華再操雙語評述，「Sky is my limit，舊年內地嘅籃球全明星賽，廣東省千幾萬人，我哋係唯一成功訪問到Kemba Walker嘅。下一步，我好想做下年東京奧運，呢個喺運動界嚟講，就好似奧斯卡咁重要。」

採訪及撰文：林妙萍
攝影：郭賢興
場地：Jamie Italian、Muay Thai Station

-----------------------------
你撐蘋果 我捐$1
支援反送中抗爭者