前晚花旗個市繼續喺高位徘徊，道指見過13673高位，不過收市就倒跌5點，美國聯儲局上次份會議紀錄話經濟前景好，但係樓市仲有得跌，通脹就喺一個令人不安嘅水平，唔知係咪咁樣就嚇窒班股民。
美股跌其實都唔係淨係搵藉口，全世界都加緊息，花旗啲核心通脹高過兩巴仙好多，伯南克同佢班馬點會唔震？大家記得睇實啲美債，近日孳息已挾咗上嚟，通常係市場迫聯儲局加息嘅先兆。花旗加息使唔使驚，你話呢？

A股同B股彈咗1日就撻番落嚟，下禮拜係咪NoEyeSee，好快就知。股市呢樣嘢好奇怪，整冧個市其實唔係啲乜嘢消息、政策或者巨無霸沽盤，而係股民突然齊齊失去信心，「人踩人」嘅股災通常就係咁樣開始，今次跌市係咪股災嘅開始，唔知，通常呢啲都係事後先至可以確定，呢個亦係股災殺傷力大嘅原因，因為不斷引人低位買貨，不斷消耗大家嘅資金，大家趁周末回顧吓以往每一次股災嘅情景，都係一樣。
港股跌31點收市，暫時唔算好差，睇多1日，如果插落去試50日線，沽壓就會大增，隨時會見到800億成交嘅跌市。
中電信C輪3575：中電信（728）昨日收4.23元，升破10日線，最高見過4.32元，尾段跟大市跌番啲，但技術走勢有改善，下禮拜睇好啲，有機會試4.60元，可以買啲中電信C輪3575，隻輪收51仙，有效槓桿率5.2倍，對沖值0.63，正股升上4.60元，3575應該喺76仙樓上，正股跌穿4元關止蝕。