古積特寶刀未老！周日荷甲煞科，面對中游分子荷華高斯只要贏波就可以封王嘅飛燕諾，開波12分鐘就靠古積特梅開二度領先兩粒，呢位36歲前鋒到84分鐘更射入12碼，上演帽子戲法，最終帶領球隊以3:1擊敗荷華高斯，34戰得82分，一搔18年聯賽錦標之癢！

至於賽前落後一分嘅阿積士，同日作客威廉二世雖然一樣贏3:1，但最終34戰81分屈居亞軍，可以叠埋心水備戰香港時間25日凌晨對曼聯嘅歐霸盃決賽。護級方面，由於洛達最後一日輸波跌落尾二，俾鹿特丹斯巴達過頭，將要同奈梅亨一齊出戰護級附加賽，伊高斯就直接降班。